Hugrún

Ég sá Kormák frá Flugumýri í Reiðhöllinni á Blönduósi veturinn 2000, hafði svo sem ekki veitt honum sérstaka eftirtekt áður og ákvað þá að halda Hlökk undir hann, bæði vegna þess að hann er kominn af eðalhestinum honum Kolfinni frá Kjarnholtum og mér fannst hann mjög fallegur hestur. Var farið með hana norður til Kormáks og út úr því kom Hugrún vorið 2001. Ég var auðvitað að vonast eftir gráu, það hafði komið grátt með Kolfinni en nei bara brún hryssa. Hún heitir Hugrún af því að hún fæddist á fermingardaginn hans Heimis en systir hans heitir Hugrún og þá var hún bara látin heita í höfuðið á henni í staðin.

Ég hafði verið búin að ákveða að fara með Hlökk undir Eið frá Oddhól og kom ég 17. maí til að keyra henni vestur í Grafarkot. Þá var kalsaveður og Hlökk ekki endilega fyrir að láta ná sér frekar en fyrri daginn og hljóp í burtu. Sá ég þá að hún haltraði og eitthvað var bogið við hana og þegar við náðum henni kom í ljós að hún var með heiftarlega júgurbólgu. Dýralæknirinn kom í hvelli og sprautaði hana og inn fóru þær, hún og Hugrún, í hesthúsið hjá Gunnari og Helgu. Júgrað sprakk og við máttum gefa folaldinu þrúgusykur og mjólk næstu daga því merin mjólkaði lítið á hinu júgrinu. Gunnar gaf henni á morgnana en ég keyrði á hverjum degi frá Blönduósi til að gefa henni seinnipartinn, eins og Gunnar hefði ekki nennt því, nei ég bara vildi fá að sinna henni líka. Hlökk var inni með folaldið í 2-3 vikur og þá virtist folaldið vera farið að fá nóg frá henni og fengu þær að fara út og fengu auðvitað sérþjónustu hjá þeim hjónum. Hlökk fór auðvitað ekki undir Eið en þar sem Garpur frá Auðholtshjáleigu var í hólfi á Þingeyrum fyrra gangmál fór hún bara þangað. Gunnar gat þá fylgst náið með þeim mæðgum og þær virtust ætla að koma þokkalega út úr þessu. Hlökk lærði vel af þessu því nú er hægt að ganga að henni hvar sem er úti í haganum. Hugrún lærði líka vel á þessu og er gæf og skemmtileg og var í tamningu hjá Tryggva veturinn 2004-2005. Tryggva leist ágætlega á hana, nokkuð klárgeng, en viljug og virðist allavega erfa brokkið og fótaburðinn frá móður sinni.

Hugrún fékk frí sumarið 2005 og fram á haust eins og oft er títt með 4 vetra tryppi. Haustið 2005 ákvað ég að senda hana í kennslu til Magga Lár og Svanhildar og fór hún þangað í lok nóvember og var hjá þeim í rúman mánuð. Aftur fór hún á Blönduós til Tryggva en þar sem hún er frekar klárgeng þá var spurningin um hvort eyða ætti í hana pening eða ekki. Ég er enn að velta þeim málum fyrir mér og veit ekki alveg hvað ég á að gera við hana en það kemur í ljós veturinn 2006-2007.