Hlökk

Uppáhalds hrossið mitt til margra ára er Hlökk frá Hólum sem verður 20 vetra í vor. Mér hefur alltaf fundist grár litur á hrossum alveg óhemju fallegur og hafði mikið fyrir því að eignast gráa meri. Fljótlega eftir að ég flutti að Hofi í Vatnsdal leið varla sá dagur að ég suðaði ekki um að kaupa gráa meri og spurði næstum því hvern einasta mann sem kom þar að bæ hvort hann vissi um gráa meri til sölu. Það var ekki fyrr en Maggi Lár, þá starfandi á Hólum, kom í heimsókn og hann vissi um gráa meri á Hólum sem var undan Dömu og Feyki.

Hún var keypt þá á 5. vetri og var ennþá eiginlega alveg svört enda sagði Maggi þegar við sóttum hana: ,,Já þær verða nú báðar (þ.e. ég og merin) orðnar nokkuð gamlar þegar merin verður orðin grá." Inni var hún um veturinn og tamin en hún var afskaplega klárgeng og alltaf mjög stygg.
Mynd tekin í Húnaveri 1992.

Hlökk fór í kynbótadóm 1992 og fékk þá 7,50 í byggingu og 7.89 í hæfileikum. Ekki hægt að telja hana í flokk fegurðardísa. Veturinn 1992-1993 var hún send til Trausta Þórs Guðmundssonar og fór þá um vorið 1993 aftur í kynbótadóm og fékk þá 7,48 í byggingu en 7.97 í hæfileikum. Þetta sama sumar fór Trausti Þór með hana á Fjórðungsmót á Vinheimamelum og þar varð hún 11. í fjórgangi, maður var nú hálf spældur. Myndin hér að ofan er tekin við það tilefni.

Ákveðið var að hún færi í folaldseignir eftir þetta mót og var henni haldið vorið 1993 undir Hektor frá Akureyri. Hennar fyrsta afkvæmi var Hekla og á hún nú 11 afkvæmi og tvö af þeim hafa hlotið 1. verðlaun, þau Hríma og Hrymur en auk þeirra á hún áðurnefnda Heklu, Hljóm, Hug, Hlyn, Hyllingu, Hugrúnu, Hendingu og Hátíð. Síðastliðið vor var hún geld en nú í vor fæddist henni enn ein merin, Hildur. Myndin hér að ofan er tekin nú í maí af þeim Hrímu með sinn jarpa hest, Hlökk með Hildi og Hyllingu sem kastar í júní.

Það er búið að vera skemmtilegt að "rækta" undan Hlökk, tryppin hafa komið vel út og ég alltaf að bíða eftir fleiri gráum merum þar sem tvær elstu hryssurnar, sem eru báðar gráar, voru seldar. Eftir 4 hesta fæddust merar 4 ár í röð og loksins kom sú gráa, enda heitir hún Hátíð. Ræktunin hefur nú ekki gengið áfallalaust fyrir sig því vorið sem Hugrún fæddist fékk hún heiftarlega júgurbólgu og sprakk á henni annað júgrað og voru þær mæðgur inni í u.þ.b. tvær vikur. Styggðin snarlagaðist við það og er hægt að ganga að henni úti í haga hvenær sem er. Þetta vor var ætlunin að fara með hana undir Eið frá Oddhól en vegna júgurbólgunnar fór hún undir Garp frá Auðsholtshjáleigu, svo sem ekkert verra allavega lítur tryppið vel út. Júgurbólgan virðist ekki hafa skemmt á henni júgrað því hún hefur alltaf mjólkað á því þó kannski hún sé ekki í fullri nit en það hefur ekkert verið skoðað, folöldin hafa þó ekki verið neitt sérstaklega stór að hausti svo sennilega mjólkar hún ekki vel.

Hlökk og tryppin héldu til á Þingeyrum hjá Gunnari og Helgu í mörg ár og þakka ég þeim kærlega fyrir það. Hjá Tryggva Björns var hún veturinn 2004-2005 þar sem hann á folaldið sem fæddist það vor.

Aftur ákvað ég að lána hana en Maggi Lár og Svanhildur höfðu komið að máli við mig um það og var það frekar auðsótt mál að minni hálfu, tekur mig reyndar langan tíma að ákveða ýmsa hluti en þar sem það var nú Maggi sem "prangaði" henni inná mig í upphafi gat ég nú ekki neitað honum um að fá undan henni. Hún fór því til aðalgæjans á landinu, Orra frá Þúfu. Það fæddist hestur 20. júlí 2006 sem fékk nafnið Hlekkur. Væntingar voru um gráa meri en það verður bara næst. Brúnn hestur er bara mjög gott mál.

Hlökk hefur haldið til í Neðra-Seli síðan haustið 2005 og verður þar að öllum líkindum eitthvað áfram. Við förum að heimaækja hana og ábúendur auðvitað í leiðinni eins oft og við getum. Þessi mynd var tekin af okkur nóttina sem hún kastaði, hún leit nú ekkert út fyrir það þarna. Ég hafði komið að kíkja á hana og morguninn eftir hringdi Svanhildur í mig og sagð mér að hún væri köstuð.

Ég fór með hana undir Klett frá Hvammi en hún hélt ekki við honum svo það verður bara að byrja snemma næsta vor. Spurning hver verður þá fyrir valinu.