Selma Svavarsdóttir og fjölskylda

Ég hef haft áhuga á hestum alveg frá því ég man eftir mér og ýmsa hesta hef ég átt í gegnum tíðina. Þeir hafa komið og farið eins og gengur og gerist og verða ekki tíundaðir hér, bara þau hross sem voru og eru í uppáhaldi hjá mér en það eru Tígull, Hlökk, Köttur og Gerpla.

Tígull

Fyrsta hestinn minn eignaðist ég 7 ára gömul þegar ég fékk Tígul hjá Magnúsi fósturföður mínum í Miðhúsum. Hann var alveg afskaplega skemmtilegur hestur og var mikið notaður bæði til útreiða og smalamennskur. Hann átti alltaf heima í Miðhúsum og var orðinn gamall þegar hann var felldur. Þessi mynd er tekin af okkur þegar við vorum að reka á fjall og vorum bæði ung.

Hlökk

Uppáhalds hrossið mitt til margra ára er Hlökk frá Hólum en hún er fædd 1985. Grár litur á hrossum finnst mér afar fallegur og hafði ég mikið fyrir að eignast gráa meri. Hlökk eignaðist ég í gegnum Magga Lár sem starfaði á Hólum á þeim tíma sem hún var keypt. Hún var tamin og sýnd en getur nú ekki talist til fegurðardísa því hún er bara með 7,50 í byggingu en 7.97 í hæfileikum. Trausti Þór fór með hana á Fjórðungsmót á Vindheimamelum 1993 í fjórgang og þar varð hún 11. Síðan þá hefur hún verið í folaldseignum og á nú 12 afkvæmi og tvö af þeim í 1. verðlaun þau Hrímu og Hrym en auk þeirra á hún Heklu, Hljóm, Hug, Hlyn, Hyllingu, sem er með 1. verðlaun fyrir hæfileika, Hugrúnu, Hendingu, Hátíð, Hildi og yngstur er Hlekkur sem fæddist vorið 2006.

Köttur

Annan hest hélt ég mikið uppá en það var hann Köttur, alveg sérstaklega skemmtilegur hestur. Hann var fæddur 1984 í Grænuhlíð austur á Héraði og keypti ég hann af Sigríki Jónssyni. Köttur var fæddur að hausti og var afskaplega smár og lítið taminn fyrr en á 6. vetri. Þá var hann hrekkjóttur og fékk nafnið Köttur því hann setti alltaf bakið uppí loft og hoppaði svo um. Ég hafði mjög gaman af honum því hann var kattliðugur og góður klárhestur. Þótt lítill væri var ekki hægt að nota hann sem barnahest því hann var sjónhræddur og maður gat aldrei verið öruggur um að hann hrekkjaði ekki. Hann reyndar hætti því þegar hann fullorðnaðist en var þá ekki mikið notaður. Hann var afskaplega lítið fyrir manninn og vildi helst ekki láta ná sér nema þegar var búið að ná honum útúr hópnum. Köttur var í Miðhúsum nú seinni ár og var felldur haustið 2004.

Gerpla

Hin ræktunarmerin mín er Gerpla frá Hofi sem er undan Skör frá Hofi og Kolfinni frá Kjarnholtum. Hún er fædd 1993 og var ekki tamin og sýnd fyrr en 2001 og fékk hún þá 7,64 fyrir byggingu og 7,78 fyrir hæfileika eða í aðaleinkunn 7,73. Var ég ekkert að eyða meiri tími í tamningu og sendi hana beint undir Gamm frá Steinnesi og út úr því kom Glódís, brúnskjótt afskaplega fallegt folald en því miður drapst hún vorið 2004. Ég seldi það folald Helgu í Miðengi og lánaði henni hana árið 2002 undir Hrym frá Hofi. Vorið 2003 kom jarpur hestur, Gustur. Þá var komið að mér og þar sem ég var ekki búin að lesa um alla stóðhesta landsins þá fór hún á næsta bæ eða til Þórodds frá Þóroddsstöðum og Gáta, rauð, fæddist vorið 2004. Gerplu var haldið undir Axel frá Lindarbæ Og fæddist brúnn hestur 2005 og á Helga það.
Vorið 2006 fæddist aftur brúnn hestur, Geisli, en hann er undan Huginn frá Haga. Sumarið 2007 fór hún til Álfasteins frá Selfossi og ætli komi ekki bara skjótt vorið 2007.