Á föstudagskvöld fórum við Raddý í Borgarvirki á tónleika. Alveg magnað, frábært veður, skemmtilegir tónleikar og fjöldi fólks.....

og umferðaröngþveitið eftir því :o)

Við Salka drifum okkur uppá Hnjúkinn í dásamlega góðu veðri á laugardagsmorguninn og í dag gengum við á Kothólinn. Alveg dásamlegur staður og fallegt að líta yfir Vatnsdalinn. Dálítið heitt í dag fyrir minn smekk ....

Um daginn var búið að lofa Bjartmari salíbunu í dráttarvélinni og ekki seinna vænna en að mæta í það sl. fimmtudag þar sem fyrri sláttur í Miðhúsum var búinn, ég man þá tíð.......
jæja nema við mætum og Eiður var að sækja rúllur uppá Flóa en þangað hef ég aldrei komið eftir að "litlu" túnin voru búin til, svo ég skellti mér með....
Bjartmar var auðvitað með Eið í dráttarvélinni, það er sko öryggisbelti fyrir farþegann :o)

Við Sigurgeir sátum á vagninum....

og ég raðaði rúllunum á vagninn ..... ég man þá tíð þegar maður raðaði böggum á vagn...... ;o)

eða hafði það bara gott ......

Sigurgeir gekk sem sagt frá endum á um 800 rúllum og merkti....

held Eiður hafi sagt mér að það væri búið að rúlla 1215 rúllur og þá er einhver slatti eftir í seinni slætti.
Sigurgeir er sem sagt kominn í frí frá heyskap og þeir fóru norður á Akureyri í sumarbústað með pabba sínum í viku :o)

Áttum frábæran dag, 2 1/2 tími í sundlauginni og ég sólbrann auðvitað þar sem ég setti ekki sólarvörn á mig....
Svo var það strákapartý og auðvitað farið í fótbolta í garðinum :o)

og kallarnir settir saman í kvöld :o)

Góður dagur :o)

Við Sigurgeir að tala við þær mæðgur 19. júlí 2003. Ég kasólétt á leiðinni á Akureyri daginn eftir :o)

Hátíð er enn á Flugumýri, fer vonandi í fegurðar- og hæfileikadóm um verslunarmannahelgina. Hlökk er í góðu yfirlæti fram í Vatnsdal, ég er góð eftir frábæra Húnavökuhelgi og Albert, Jóhanna og Helga Guðrún nýfarin eftir að hafa gist í innkeyrslunni hjá mér í nótt, yndislegt, takk takk fyrir komuna .....

er líka með annarskonar gesti sem ég hef ekkert rosalega gaman af að hafa og hún Guðrún mín ætlar að koma og losa mig við þá, skil ekki hvað þeir sækja í mig....

Helgin var æðisleg, upp úr öllum herlegheitunum stóð:
Tónleikar í kirkjunni með Sísu, strákunum hennar og söngvara frá Akureyri. Algjörlega magnaðir tónleikar og ég er svo fegin að hafa drifið mig af annars góðri og skemmtulegri dagskrá annars staðar í bænum. Fór líka í Kvennaskólann og vá hvað ég var hissa að sjá hvað hann er orðinn flottur að innan. Frábært framtak og skemmtilegt að sjá.
Fór líka á Heimilisiðnaðarsafnið sem ég hef ALDREI gert og bý þó hér. Svo fallegt safn og ótrúlegt að sjá svona fallega, vel varðveitta muni. Góð greinin í Feyki um uppáhaldsmunina hennar Elínar Óskar sem vinnur á safninu. Hvet alla til að fara og skoða það. Þarf að fara aftur með gleraugun svo ég sjái handverkið á þessum listmunum, svo ótrúlega flott og vel gert hjá þessum konum, áðdáunarverðar og snillingar í huga og hönd :o)

Sigurgeir fékk "frí" um helgina en átti þá bara eftir að ganga frá endum á 215 rúllum sem voru rúllaðar á meðan hann var í burtu, hann sendi mér sms í morgun; 1 tún búið 6 eftir :( Hefur nú bara gott af þessu :O)

Við drifum okkur á hestbak í lok júní og það var ótrúlega gott og gaman, enginn hósti og hor :o)
Þessar tvær, þ.e. Toppa og Fagrajörp voru síðan sendar í Hæli í hestaferð :o)

við gömlurnar kysstum auðvitað í bak og fyrir áður en við fórum heim .....

og gott að fá ávexti á pallinum þegar heim var komið

Nú ég sá fram á það að helgin 9.-11. júlí væri sennilega eina helgin sem ég kæmist í "sumarfrí" með strákunum því um næstu helgi er Húnavaka, síðan fara þeir í bústað með pabba sínum og verða einhverjar vikur með honum og þá er nú eitthvað lítið eftir af sumrinu þegar þeir koma til baka......

Svo ég ákvað að fara á Hótel Mömmu og vera þar nokkra daga sem við og gerðum sl. miðvikudag.

Fimmtudagur fór í að búðaráp, eins leiðinlegt og það nú er en strákarnir voru alveg orðnir fatalausir svo það var rétt að nota útsölurnar.
Fórum á Hamborgarafabrikkuna seinnipartinn og strákunum fannst það nú ekki leiðinlegt. Jói var meira segja að vinna og huggaði Bjartmar þegar hann datt af stólnum sínum. Þá varð auðvitað allt gott
aftur :o)
Hammararnir voru súper og ísinn, sem ég borðaði bara ein því allir voru svo saddir, var frábær :o)
Ég var sem betur fer búin að panta borð þar því allan tíman sem við vorum þar var röð.
Skruppum á Álftanesið um kvöldið :o)

Föstudag fórum við á Reykjanesið, hef aldrei farið þar hring og við byrjuðum á Reykjanesvita.
Bjartmar hljóp upp stíginn og við hin komum á eftir :o)

Síðan var það Gunnuhver...

og brúin á milli flekaskilanna Evrópu og Ameríku, hafði t.d. ekki hugmynd um að hún væri til :(

Skessan í Keflavík var skoðuð, Garðskagaviti, Sandgerði, heim og sund (ekki mamma) í Álftaneslauginni sem er alveg meiriháttar. Allir glaðir eftir frábæran dag.

Á laugardeginum stormuðum við í Árbæjarsafnið en urðum frá að hverfa sökum úrhellisrigningar. Við urðum rennandi blaut bara á því að labba milli húsa. Förum aftur þangað þegar betur viðrar.

Fórum auðvitað í bíó og sáum Toy Story 3 í 3D sem var bara frábært.

Sunnudag fórum við í Hallgrímskirkjuturn ásamt erlendum
ferðamönnum :O) Gaman að koma þar í góðu veðri. Tókum rúnt um miðbæinn og síðan var lagt af stað heim á leið með viðkomu hjá Gumma bróður og Huldu í Mosó.

Frábærir dagar hjá mömmu og með strákunum og mömmu. Ómetanlegir og dýrmætustu tímarnir sem maður eyðir með sínum nánustu á hvaða hátt sem maður gerir það :o)
Líka gaman að vera ferðamaður og geta gert það sem okkur langaði til þessa daga :o)

Skutlaði svo Sigurgeiri í Miðhús á sunnudagskvöld því hann átti að mæta í vinnu hjá afa sínum. Í gær var búinn að sækja kýrnar, fara í fjósið og labba 3 tún að fela enda á rúllum. Mjög mikilvægt starf, þá rifnar ekki endinn af og fýkur í burt eins og maður sér stundum.

Þannig alltaf nóg að gera :o)

Á þriðjudeginum fór ég út á Skagaströnd að kenna, fór svo með strákana fram eftir í "vinnuna". Fór aftur á Skagaströnd og svo aftur fram í Miðhús að sækja Bjartmar þegar hann kom heim af heiðinni. Það var svo ofboðslega gaman að hann vildi endilega koma aftur og gista líka eins og Sigurgeir. Af hverju má hann alltaf vera vinnumaður en ekki ég sagði hann. Afi hans lét þetta eftir og úr varð að hann mætti í "vinnuna" á fimmtudag, gisti og fór síðustu heiðarferðin sem var farin í gær, föstudag.
Verð að segja það að það er ómetanlegt að hafa aðgang að sveit fyrir strákana, vildi auðvitað að ég hefði átt þess kost að geta alið þá upp í sveit en það er frábært fyrir þá að geta komist í sveitina og gert gagn.

Hrútarnir fengu að fara með uppá heiði,
þ.e. þeir sem "treystu" sér.....

uppá heiði, afi að "skipa" mér fyrir eins og Bjartmar sagði :O)

Sá í Feyki að Guðný ritstjóri Feykis hafði farið Vatnsneshringinn eins og við mamma, daginn eftir að við mamma fórum.
Við mamma vorum einmitt að tala um það að við hefðum átt að fara á laugardeginum þá hefðum við getað mætt í Fjöruhlaðborði en við vorum bara degi of snemma og förum bara næsta ár :o)
Eins og Guðný segir þá þarf ekki alltaf að fara langt til að breyta um umhverfi og sá eitthvað skemmtilegt og það er sko margt skemmtilegt að sjá í Vestursýslunni, maður fer bara þarna í gegn því maður er alltaf á leiðinni suður. Ég er reyndar búin að fara margar ferðir á Hvammstanga að kenna og finnst ekkert eins skemmtilegt og kenna þar, afskapalega fallegur bær og vel hirtur, skemmtilegar brekkur að taka af stað í og "down town" er svo krúttlegt alltsaman.

Vatnsneshringurinn er nú sennilega sá hringur sem ég hef oftast farið hér um slóðir því hann fórum við alltaf sem krakkar þegar þessi "eini" frídagur sumarsins var tekinn og allir settir í Landrover og skröltum heilan dag um Vatnsnesið. Ekkert skemmtilegt í minningunni en þó þannig að það var þá allavega farinn einn dagur. Þá var svolitið búsældarlegra en er í dag en sennilega var ég ekki að hugsa um það í þá daga hvort búið var á bæjunum eða ekki. Sennilega hefur Maggi spáð mikið í búskapinn á bæjunum :o)
Síðan keyrði ég þennan Vatnsneshring í öllum hestaferðunum sem ég fór í hjá Arinbirni á Brekkulæk þegar ég var bílstjóri hjá honum. Alltaf farinn hringurinn og skoðaðir selir, Hvítserkur, Borgarvirki og farið í sund á Hvammstanga. Mjög skemmtilegur hringur.
Þannig í raun þarf maður aldrei að fara langt til að skoða sig um, en það er auðvitað gaman að fara eitthvað lengra og sjá það sem þar er, langar t.d. mikið til að eyða viku á Snæfellsnesinu, þangað hef ég eiginlega ekkert komið.
Mikill munur á ferðalögum þá og nú, veit ekki hvað strákarnir eru búnir að ferðast mikið með okkur og vona að það verði þeim dásamlegt í minningunni þegar þeir verða fullorðnir.
Ferðalög mín, sem krakki, með foreldrum mínum eru líka dásamleg í minnungunni en bara óskaplega fáar, held ég muni frekar eftir hestbaksferðum mínum :o)

En allavega þá sá mamma þessa steinaveru í Bardúsu, fannst hann svo líkur mér að hún keypti hann og gaf mér :o)

og túlípanarnir á Bæjartorginu eru fallegir á litinn...

Mamma er farin heim, strákarnir komnir heim og kannski best að slá garðinn eða fara bara á hestbak :o)

Síðasta vika var svolítið stíf, það voru 5 í próf á miðvikudag svo það var í nógu að snúast fyrir þann dag, þ.e. að keyra :o) Allt gekk mjög vel. Sundlaugin var opnuð líka þann dag og strákarnir mættu að sjálfsögðu og nutu sín í rennibrautunum.....

ég fór með þeim á föstudeginum og vorum í tvo tíma, ég sólbrann og þeir renndu sér í rennibrautunum allan tímann sem við vorum í lauginni :o)

Á miðvikudagskvöldið fórum við í saumó ásamt börnum á pallinn í Fagranesi og grilluðum og það var auðvitað meiriháttar....

..... veit ekki hvaða pallur er skipulagður í þessari viku :o)

17. júní fór að stússast í kringum hátíðarhöldin sem voru hér í bæ, en hestamannafélagið Neisti sá um þau og það lukkaðist bara ljómandi vel. Frétt og myndir á Neista :o)

Ég bauð mömmu á rúntinn á föstudag, af því mér finnst svo gaman að keyra og skruppum í Reyki til Huldu að kaupa blóm, það var æðislegt, alltaf frábært að koma til hennar og blómin þar eru svo flott.
Nú við gátum auðvitað ekki farið beina leið heim og komum því við í nýja markaðnum á Laugarbakka, Bardúsu og nýja kaffihúsinu, Hlöðunni, á Hvammstanga og svo fórum við Vatnsneshringinn. Hef ekki farið hann síðan ég var að keyra fyrir Arinbjörn í hestaferðum. Mamma hafði ekki farið hann heldur síðan á síðustu öld :o)

Á laugardag mætti ég með Sigurgeir í vinnuna og þeir voru
kampakátir að hittast kallarnir.....

og rollurnar kampakátar að fara uppá bílinn sem flytur þær í
frjálsræðið uppi á heiði ...

Ég lét þau um rollurnar en fór í Þingeyra að líta á dýrgripina mína þar og hitta heimilisfólkið þar. Alltaf gott að koma þangað og taka spjall um daginn og veginn. Sá þar fullt af flottum hrossum en þá aðallega þessa tvo...
Háfeta sem ætlar að gera garðinn frægan á Landsmóti 2014....

og Hrafnaflóka sem ég mun alveg hafa frið með þar sem hann er bæði brúnn og missir kúlurnar sínar næsta vor :o)

Í dag kenndi mamma mér að baka kleinur, hef nú ekki lagt í það þar sem ég hef alltaf talið þetta frekar flókið verk og miklu auðveldara að fá bara kleinur hjá henni þegar maður er á ferðinni fyrir sunnan en þar sem ég hef ekki farið suður síðan ég man ekki hvenær þá þarf ég auðvitað að fara að fá mömmukleinur svo hún skellti í eina uppskrift í dag....

ég laumaðist burt áður en hún kláraði og fór á hestbak á Toppu, hún hóstaði þegar ég var búin að fara á bak og Fagrajörp hóstaði eftir að hún hljóp um girðinguna þegar við Toppa vorum að koma til baka svo ég var ekkert að prófa hana. Gef þeim lengri tíma í fríi.

Kleinurnar voru frábærar og held mamma ætli að baka aðra uppskrift á morgun.

Við fórum seinnipartinn og horfðum á Hans klaufa með leikhópnum Lottu. Algjör snilld :o)

Það voru reyndar fleiri sem vildu vera á pallinum hjá mér en það var eins og eitt geitungabú sem ákvað að besti staðurinn væri undir þakskegginu á bílskúrnum beint fyrir ofan sólstólana mína. Guðrún mín besta kom og fjarlægði það. Mjög var ég fegin að losna við það.

Mamma kom á föstudagskvöldi og við fórum í alveg frábæra útskriftarveislu hjá Arnheiði, Höskuldi og Einari en þau útskrifuðust öll úr VMA úr vor. Afskaplega fallegt og flott fólk. Innilega til hamingju með þennan áfanga.
Búin að setja myndir inná myndaalbúmið og líka úr fermingunni hennar Jennýjar.

Skruppum í Helgavatn á sunnudag en Valli og Jóhanna eru sem betur fer bara flutt heim aftur frá Akureyri og er ég voðalega glöð með það.

Stjórn Neista er að skipuleggja dagskrá hátíðarhalda 17. júní á Blödnuósi en hestamannafélagið hefur haft umsjón með þeim hátíðarhöldum nú í nokkur ár. Sem sagt fundir á hverju kvöldi .....

Á miðvikudag verður sundlaugin opnuð og það á sko að mæta strax þann dag. Við í saumó ætlum lika að mæta á pallinn í Fagranesi eftir sundferðina og borða mikið :o)

Annars allt við það sama ...

Í 2. lagi keyrði ég líka 1000 km um síðustu helgi. Fór á formannafund hjá LH á föstudag um Landsmót ofl. Ekki að ég sé formaður heldur komst enginn nema ég :o)

Á laugardag fórum við í ferminguna hennar Jennýjar á Akureyri. Rosalega flott og gaman. Alltaf svo gaman að hitta alla og algjörlega æðislegur dagur :o)
Hér er Jenný með fjölskyldunni sinni :o)

Á sunnudag fórum við í Þórdísarlund að kanna aðstæður þar sem ég átti að halda saumó næst taldi ég tilvalið að við færum þangað í leiki og grill....
Strákarnir fundu sér allavega eitthvað að gera....

og það er auðvitað bannað að leika sér uppá borðum :(

Á mánudag sló Bjartmar garðinn og fór létt með það :o)
Ótrúlega duglegur því það er ekkert voðalega auðvelt að slá þennan garð, svo mikill mosi í honum.

Á þriðjudag voru skólaslit og þau tókust auðvitað glimrandi vel....

Seinnipart á miðvikudag stormuðum við saumósystur með fjölskyldur okkar í Þórdísarlundinn og áttum þar frábæran dag. Berglind var auðvitað með tjaldið sitt góða....

og svo voru grillaðar pylsur ......

og sykurpúðar :o)

og alltaf þar sem við komum saman er tekin upp handavinna ;o)

Svoooooooo gaman :o)

Á fimmtudag fór ég á Hvammstanga að kenna og á föstudag fórum við í sund í Varmahlíð........

Hér erum við á leið upp tindinn, ég greinilega síðust :)

Ísól, Jóhanna, Bjatmar og Sigurgeir skelltu sér með okkur ....

og Sigurgeir tók mynd af okkur gellunum, útsýnið líka frábært....
Selma, Gerður Beta, Harpa, Sædís, Erna, Sigrún, Erla og Berglind

svo verður farið vikulega í sumar á tinda héraðsins og sund
þar á milli :o)

Um síðustu helgi keyrði ég 1000 km. Á föstudag skaust ég í Borgarfjörðinn að ná í Sölku sem fór og hitti kærastann sinn hann Kóp. Verður gaman að fylgjast með því hvort eitthvað kemur út úr
því, sem þýðir ekkert sumarfrí :)

Á laugardag fór ég í kennsluferð til Akureyrar.

Á sunnudag fór ég í fermingarveislu hjá föðurfólki mínu í Skagafirði, mjög notalegt og flott.

Á mánudag kom orkan í heimsókn og ég tók til í garðinum :o)

Í dag fóru strákarnir í skólaferðalag. Sigurgeir og hans bekkur fóru uppí Dalsmynni og ætla að gista þar. Verður örugglega frábært.
Bjartmar fór á Hvammstanga með 1. 2. og 3. bekk að skoða selasafnið og í leiðinni heim átti að stoppa í Þórdísarlundi, gaman hjá þeim.
Margt hægt að gera og fara hér í nágrenninu, þarf ekki endilega alltaf að fara langar leiðir til að sjá eitthvað skemmtilegt.

Annars allt við það sama, hestarnir allir í fríi, búin að fresta Knapamerkjum fram á haust, allavega að sjá til hvað er framundan, get ekki ímyndað mér að það verði Landsmót úr þessu, held við ættum að hugsa algjörlega um hag hestanna en ekki hvot einhver græðir eða tapar. Ætli tap hesteigandanna sé ekki mest, búnir að hafa hestana sína í þjálfun í allan vetur og svo verður ekki neitt en betra að gera ekki neitt en fara út í óvissuna með heilsu þeirra.

Eftir síðasta tímann hjá Hönnu kom Sigurgeir með snilldarhugmynd að fermingargjöf (næsta ár sko). Hann ætlar á námskeið hjá honum Nevzorov, ég væri svo sem alveg til í að kunna þetta, spurning hvort væri ekki bara sniðugt að fá hann hingað :)
Ýmislegt hægt ef viljinn er fyrir hendi :O)

Sigurgeir fór til afa síns um síðustu helgi í sauðburðinn og var dauðuppgefinn þegar hann kom heim. Þessi vika er undirlögð í prófum hjá honum og endar með bóklegu próf í knapamerki 2. Honum finnst þessi prófavika hreint hræðileg og ég skil hann sko vel en þá er hún líka búin og þarf ekkert að hugsa meira um það þetta árið :o)
Hann ætlar svo aftur í sveitina þessa helgina, vonandi verður kindin hans borin núna en hann var að reyna að skipta við afa sinn á kindum en það gekk nú illa þar sem gamli vildi endilega fá einhverja milligjöf. Sigurgeir sendi mér alltaf sms um hvað var í gangi og ég sagði honum að lokum að hann gæfi ekkert í milli, kindin hans væri með horn en hin ekki svo það ætti að vera nóg.

En að hestamálum. Hef ekki hreyft hestana mína í maí þar sem þessi kvefpest skall hér á eins og hendi væri veifað. Langaði ekki í dýralækniskostnað á þá svo ég ákvað að hreyfa þá ekki neitt í nógu langan tíma að þeir væru pottþétt orðnir góðir þegar við færum aftur af stað. Hef ekki hugmynd um hvort þeir eru góðir eða ekki.
En Hylling mín og er farin undir Sólon frá Skáney. Helga og Gunnar á Þingeyrum eiga það folald þannig að ég fæ ekkert folald næsta ár sem er bara gott, hvað hefur maður að gera með alla þessa hesta :o)
Hér er mynd af þessum flotta brúna hesti undan Hyllingu og Glym.
Skemmtileg sagan sem fylgir þessari mynd sem ég stal af síðu Þingeyrabúsins.

En byrja á vortónleikum Tónlistarskólans sem voru 29. apríl. Að sjálfsögðu mæting þar.

Bjartmar og Björn Ívar spiluðu saman tvö lög á blokkflauturnar sínar með Stefáni. Svo flottir og duglegir og gaman að sjá hvað þeir eru búnir að læra mikiðí vetur aðeins í hálfu námi.
Er nú að reyna að setja inn myndband en það tekur ár að hlaðast inn en ef þið nennið þá getið þið kíkt á það undir myndbönd.

Sigurgeir spilaði á saxann, svo mikill stíll yfir honum með saxann :o)

og svo þeir strákarnir, Sigurgeir, Kristófer og Skarphéðinn á gítarana sína, þeir Sigurgeir og Kristófer eru búnir að vera að læra á gítara í hálfu námi í vetur, á móti saxanum - Sigurgeir og trommur - Kristófer.

og síðan voru strákarnir með hljómsveit. Rosalega flott hjá þeim :o)

Nú eldsnemma á föstudagsmorgni 7. maí var svo lagt af stað til Vestmannaeyja á Landsmót Lúðrasveita. Þar lentum við kl. 16 eftir góða sjóferð með Herjólfi. Það tóku allir sjóveikitöflu svo enginn varð sjóveikur enda líka gott í sjóinn og geggjað veður.
Við komum okkur fyrir í Hamarsskóla og síðan gengu hópar á æfingastaði.
Gulir, þ.e. yngstu krakkarnir sem voru 13 fóru með Hauki og Kristínu Ingibjörgu í framhaldsskólann. Þaðan var styðst í Höllina en þar var matur fyrir alla; morgunmatur, hádegismatur og kvöldmatur og þangað var langur gangur fyrir alla hina.
Rauðir voru niður í Týsheimili og þar var Skarphéðinn að stjórna og hafði hann Garðar með sér í þá sveit.
Grænir voru 6 og ég og Berglind fylgdum þeirri sveit þar til þau rötuðu um bæinn þá fórum við að versla...... hahahahaha
Bláir voru í Betel en þær voru 3 og Ásdís hjúkka passaði uppá þær og síðan var það slagverkið sem var í Akogos og Sigga hjúkka sá um þá.

Á föstudagskvöldinu var mótsetning og skemmtun eftir kvöldmatinn og það voru þreyttir krakkar sem fóru að sofa á föstudagskvöldiu.

Æfingar, sundlaugarferð í frábæra sundlaug, bátsferð á laugardeginum og síðan diskótek um kvöldið, frábær dagur og allir sofnaðir um 11.30 á laugardagskvöldinu, algjörlega búnir á því.
Ræs kl 7 á sunnudagsmorgunn, taka til, koma dótinu út á bíl, morgunmatur uppí höll, æfing, hádegismatur uppí höll og síðan frábærir tónleikar kl. 13. Maður verður svo stoltur að hlusta á lögin sem þau ná að æfa og gera svo flott á þessum stutta tíma. Alveg sama hvaða sveit það er, svo ofboðslega flott og vel gert hjá þessum krökkum. Frábært og flott.
Síðan var strauið tekið í rútu niður í Herjólf og þau voru mörg ansi þreytt og sofnuðu þar. Vorum komin á Blönduós kl. 24 og þá beint heim í rúm og ofboðslega dösuð í dag.

Tók "nokkrar" myndir en þær eru komnar í myndaalbúm en hér
er mynd af "græna hópnum okkar" og mér :o)

Hér er svo mynd sem tekin var þegar komið var til Þorlákshafnar á leiðinni heim :o)

Algjörlega frábær ferð í alla staði. Takk fyrir mig :o)

Það er eitthvað svo ansi margt núna...

Æta samt að byrja á flottu strákunum mínum sem stóðu sig svo vel á sumarskemmtun Grunnskólans en eins og alltaf þá er hér skemmtun á sumardaginn fyrsta og krakkarnir í 1. - 7. bekk sjá um heimatilbúin skemmtiatriði.
Bjartmar og hans bekkur fóru með Guttavísur og voru svo flott. Hann söng þetta hástöfum fyrir kallana í knapamerkjunum á miðvikudagskvöldinu og fór létt með það. Ég man aldrei nema fyrsta erindið.
Hér eru þau öll :o)

Krakkarnir í Sigurgeirs bekk tóku nokkur vel valin atriði úr skólalífinu og voru ótrúlega flott, svo gaman að sjá hvað þeim dettur í hug að búa til og gera.

Nú ég mætti á skemmtunina í nýjustu afurð Fanneyjar systur minnar, hún er snillingur í prjóni. Hún mætti hingað með þennan kjól um daginn og spurði hvort ég gæti notað hann, ég hélt það, hún hélt kannski að ég vildi annan lit (tekur greinilega enga stund að prjóna annan) en ég hélt ekki, hvítur er svo sem ekki uppáhaldsliturinn minn en je minn þvílíkur kjóll :o) Takk Fanney besta systir :o)

Nú ég held svei mér þá að annað snúist algjörlega um hesta, ég má bara alls ekki vera að því að vinna fyrir mér lengur þar sem annaðhvort er ég á námskeiði eða strákarnir, knapamerkjapróf, skipulag, bréfaskriftir, fundir, sími og annað sem viðkemur hestum.....

Kallarnir í knapamerkjunum fóru í próf 21. apríl og það gekk glymrandi vel. Allir glaðir (sjá www.neisti.net) og virkilega gaman. Þá eru 20 manns búin að taka próf, 10 konur og 10 karlar. Spurning um að hafa keppni milli kvenna og karla ......

Fór á sýninguna Fákar og fjör á Sauðárkróki og varð svo sem ekkert rosalega hrifin, finnst eins og ég sé búin að sjá þetta 100 sinnum alltaf sama fólkið og hestarnir, spurning af hverju ég var þá að fara....

Dívurnar úr V.-Hún standa alltaf fyrir sínu, ótrúlega flott atriði og búningar, hraði, mýkt, frábærlega útfært og bara gaman að horfa á þær þó ég sjái þær á hverju ári og oft á ári.

En Æskan og hesturinn er um næstu helgi á Sauðárkróki og það er mæting þar, æfingar hjá krökkunum á miðvikudag og fimmtudag. Vonandi verður veðrið gott, það verður allt svo erfitt eins og við vitum ef veðrið er ekki gott en þetta verður bara gaman. Þá held ég að sýningahaldi vetrarins sé lokið og það er í sjálfu sér ágætt, það tekur bara eitthvað annað við :o)

Nú svo má nú ekki gleyma honum Brún litla sem fæddist í gær.
Það var mail frá Gunnari í gærmorgun;
"hver er nú hlaupandi um túnið kl 7 á mánudagsmorgni í glampandi sól og logni?
- einhver sem ég sá ekki í gær."
Við Bjartmar drifum okkur frameftir eftir skólann hans, Sigurgeir valdi að vera heima í vatnsbyssuslag. Á leiðinni var ég að hugsa um að skíra "hana" Sóldísi af því á mailinu stóð "sólin".

En, sem sagt, Hylling sem er bleikálótt átti "bara" brúnan hest. Pabbin Glymur frá Innri Skeljabrekku er sko flottastur "ever" og er móvindóttur en á vef Eiðfaxa fann ég;

Litur afkvæma

Vindóttur/mó 33.33%
Aðrir litir 21.00%
Brúnn/milli- 15.25%
Rauður/milli- 14.12%
Vindóttur/jarp- 9.04%
Rauður/ljós- 7.34%

sko brúnn var nú ekki alveg á óskalistanum en flottur er hann samt :o)

Hér er hann með mömmu sinni....

og svo er hann svo mikið krútt :o)

Er eitthvað að dunda við að setja myndir inná Neistasíðuna á miðvikudagskvölið þegar ég heyri að Bjartmar er kominn fram á gang og bullar einhverja vitleysu. Hann vaknar aldrei á kvöldin og fer þaðan að síður fram á gang. Fer til hans og hann fer á klósettið og ég mátti ekki halda á honum fyrr en hann fer aftur uppí rúm sem ég og geri og finnst hann fullkaldur. Fer og næ í mælinn og mæli hann og þá er hann í 175. Hringi í Begga sem kemur og fer með hann uppá sjúkrahús þar sem tekið er hjartalínurit, alltaf að taka línurit segir Hróðmar. Gefum honum hjartapillu sem við héldum auðvitað að myndi slá á þennan hraðtakt en nei ekkert gerist og læknirinn sagði suður með hann ef ekkert myndi gerast. Þeir fóru suður, ekki hægt að skilja Sigurgeir einan eftir heima. Takturinn hafði ekkert lækkað á leiðinni og var kominn yfir 200 þegar suður var komið. Fékk súrefni þar og þurfti svo mikið að gubba af því að hann rembist svo mikið að þá fór takturinn niður. Þeir hittu svo Hróðmar á fimmtudagsmorgunn og nú á að fara að gera eitthvað.......

Og nú er Bjartmar bara sprækur sem lækur :o)

Af öðru þá gekk æskulýðssýningin snilldarvel, það var frábærlega gaman og flott sýning og allir voru ánægðir. Fullt af myndum eru á myndaalbúmi Neista.

Bjartmar trúður, litlu krakkarnir voru trúðar :o)

Sigurgeir, kúreki, í sveiflu :o)

Ég fór í próf í Knapamerki 1. stig á mánudagskvöldið og það gekk bara vel, við voru 13 sem fórum í próf og öllum gekk bara vel. Voðalega gaman.

Nokkrir í próf hjá mér á miðvikudag og þau gengu vel, á fimmtudag var sprungið á mér svo ég gerði bara ekki neitt.....